Nicolás Martínez Agosti (Palencia, 16 d’agostu de 1858- L'Infiestu, 8 d’ochobre de 1926) Xurisconsultu y escritor astur de los sieglos XIX-XX.
Biografìa Anque’l so nacimientu nun tuvo llugar n’Asturies, pola so ascendencia, convivencia y devociones yera un asturianu auténticu. Los sos padres, don Nemesio Martínez Cuesta y doña Elisa Agostí González-Alverú, yeren ovetenses y dambos descendientes d'antigües families asturianes. El padre figuraba ente’l personal de confianza del inxenieru don Eduardo Saavedra, na construcción de los llamaos ferrocarriles del Noroeste (Asturies, Galicia y Lleón), cuando Martínez Agosti nació en Palencia.
La so infancia (y la mayor parte de la so vida) trescurrió n’Infiestu, onde vinieron a establecese los sos padres. Nesta villa cursó la instrucción primaria y Latinidá, esta última col celebráu latinista don Pedro Regalado. Dempués siguió los estudios de bachilleratu nel Institutu de Segunda Enseñanza d’Uviéu y, darréu, los de la Facultá de Derechu na Universidá de la mesma población, hasta llicenciase en Derechu civil y canónicu en 1878.
Dalgunos años dempués fizo oposiciones al cuerpu de Rexistradores de la Propiedá, nel que ingresó. Dende 1884 hasta 1888 tuvo al frente de los rexistros, socesivamente, d’Ordes (La Coruña), Cabuérniga (Santander) y Viveiro (Lugo). Y llegaría a rexentar dalgún de los más importantes d’España si nun tuviera que dexar aquel exerciciu profesional y pasar a situación d’escedente por mor d’atenciones de calter familiar.
Establecióse entós como abogáu n’Infiestu, villa que consideraba como’l llugar del so nacimientu: nella permaneció dedicáu a los negocios del foru por espaciu de munchos años, con llar propiu dende’l 17 de febreru de 1892, casáu en Madrid con doña María Hombre Chalbaud. N’Infiestu y en bona parte de la comarca central d’Asturies, asina como énte los tribunales superiores de la provincia, Martínez Agosti gozó de reputación, tanto pola so competencia profesional como pola probidá de la so conducta.
Nos años 1901 a 1903 desempeñó’l cargu de xuez municipal suplente. Tamién por aquella dómina foi nomáu alcalde, reconocíu darréu en tol conceyu de Piloña como ún de los rexidores de proceder más ecuánime y gobiernu más honráu.
La so afición a les lletres, ensayada yá nos años d’estudiante, foi dedicada preferentemente a promover el progresu y el bienestar públicu d’Infiestu y del so conceyu. De les sos collaboraciones esparcíes por dellos periódicos asturianos, más abondantes nel diariu xixonés El Comercio, onde firmaba col seudónimu de Un Vecino cróniques baxo’l títulu de El perfil de Piloña, recoyó estes últimes nel volume darréu anotáu.
En 1907 treslladóse a Madrid, onde vivió dende entós durante los iviernos. Pasaba les temporaes de branu n’Infiestu, onde finó’l
L’Ayuntamientu de Piloña dedicó una de les cais de la villa a la so memoria.
Obres publicaes en volumen El perfil de Piloña. (Madrid, 1919; colección de cróniques. Firmada col seudónimu de Un Vecino y con prólogu d’Alfredo García, Adeflor)
Bibliografia Gran Enciclopedia Asturiana, ed. Silverio Cañada, Xixòn (1974); vol.9, pg. 247
Referencies ESCRITORES Y ARTISTAS ASTURIANOS NOTAS BIOGRAFICAS SOBRE NICOLAS MARTINEZ AGOSTI por Elena Martínez-Hombre González
Categoría:Xuristes d'Asturies