El Pinganón del Caideru ye una cascada que topamos nel Conceyu d´Ayer (Asturies). La ruta entama nel pueblin de "Collanzo" que queda de pasu pa dir a les estaciones d´esquí Fuentes de Invierno y San Isidro. Pue dexáse´l coche ehí o subilu hasta otros pueblinos, anque ye recomendable dexálu en Collanzo porque hai bastante p´aparcar.
Esta ye d´unos 7 kilómetros, pue facese alrodiu 3 hores y tien una altura de unos 1.060 metros. Ye una ruta bastante pindia polo que pa facer con neños pue resultá-yos bastante cansada.
Dende l´aparcamientu la ilesia sales caminando p´arriba pela carretera. Pases "Santibanes de la Fuente", que como datu curiosu hai un texu de alrodiu 20 metros d´altura y una ilesia del sieglu XIII "San Juan del Riomera" Más p´arriba tópase "El mirador de la Pandiella" y "La Fuente", otru pueblin mui acoyedor.
A partir d´ehí pasase de carretera a pista. Hai unos 700 metros de desnivel de subida pero ye una ruta cenciella na que nun hai pérdida nenguna porque ta too mui bien señalizao con carteles y rayes blanques y marielles. Dende la pista puen vese vistes precioses al pueblin de "Cuérigo/Cuergo". Tamién hai vistes prestoses al Picu Cuetu o Picu Cuchu. Acaba la pista y hai que pasar per un senderín más complicáu pa llegar a la cascada. Hai un arbolón que nos marca la recta final y va sintiéndose´l ruíu l´agua.
Pa finalizar topes la cascada, perguapa. Pa facer la ruta ye meyor facela a finales de la seronda o iviernu anque tamién ta guapa en primavera. La cascada va tar más guapa dempués de llover porque va llevar muncha más agua. Amás pel iviernu pue ser que topes la ruta con nieve ya que ta a bastante altura. Ye una ruta que se pue facer con raquetes de nieve y tamién facese en bicicleta menos l´últimu tramu.
Anque nun se conoza muncho, esta zona suel tar bastante transitada pela xente de los pueblos d´alrodiu. Esto ye porque ye una zona na que se lleven les vaques pal puertu pela primavera, onde los ganaderos tienen cuadres y cabanes pa quedase ehí. Ye una zona mui prestosa onde vas topar muncha diversidá de vexetación y animales. A principios de setiembre va muncha xente pa ver la berrea, ye una zona onde se ve y s´escucha perbien.
Ye perfeuta pa pasar un bon ratu cola familia y amigos, conectar cola naturaleza y despexar la mente davezu.