Marisa López Diz ye una poeta, cantante, compositora, cineasta y profesora española. Ente les sos reconocencies, atópense'l Premiu Cálamo de poesía erótica, el María Josefa Canellada o el Teodoro Cuesta.
Trayeutoria Ñació en 1970 na llocalidá asturiana de Xixón. Llicenciada en Filoloxía Hispánica, especializándose en llingua asturiana y eonaviega. Foi profesora de Llingua Castellana y Lliteratura en Colombres, nel conceyu de Ribadeva, onde vivió casi una década . Nesa etapa, compuso'l cantar "Ribadeva contigo nel corazón" convertíu nel himnu de la llocalidá.
Escribió les sos obres poétiques, como Tiempu de tristura (1998) y A terra esqueicida (2007), y de narrativa, tantu infantiles como p'adultos, en castellán, asturianu y eonaviego. Ente les sos obres empobinaes al públicu infantil/xuvenil atópense Poemes de carambelu (2006), Binoca (2008) y Malva y el papapallabres (2010).
En 2012, estrenó el curtiumetraxe A fiya del xastre. Formó el Dúo Mestura con Luis Manuel Suárez, llanzando dellos discos. Amás, espublizó un discu-llibru con beneficios destinaos al Bancu d'Alimentos.
Reconocencies A lo llargo la so trayeutoria, López Diz algamó decenes de reconocencies, como'l Fernán Coronas en 1998, l'Elvira Castañón en 2001 o'l Premiu Xeira en 2007. En 2013, ganó'l Premiu María Josefa Canellada de lliteratura infantil y xuvenil, otorgáu pola Conseyería d'Educación, Cultura y Deporte del Principáu d'Asturies. Algamó esti galardón pola so obra Tatuaxes nel corazón presentáu sol seudónimu Montenegro.
Al añu siguiente, foi reconocida nel VII Certame de Poesía Mujeres Silenciadas 'Arxentina Rubiera', entamáu pol Conceyu de Llangréu xunto al Colectivu Les Filanderes y l'Asociación de Muyeres El Fresnu. En 2016, llogró pol so poemariu Les races del olvidu, que presentó sol seudónimu Carrespientes, el Premiu Teodoro Cuesta, que-y foi apurríu pol entós alcalde de Mieres, Aníbal Vázquez.
N'ochobre de 2021, foi reconocida pol so poemariu Sol branu de la to boca, col premiu “Cálamo” de Poesía Erótica qu'otorga la Sociedá Cultural Xestu, certame al que se presentó col seudónimu Cécile de Volanges. En 2022, foi nomada Poeta al Alba en Candás, interpretando mientres l'actu d'entrega'l so cantar Candás, alma marinera.
Referencies
Categoría:Cantantes d'Asturies Categoría:Persones nacíes en 1970 Categoría:Muyeres Categoría:Escritores asturianes Categoría:Lliteratura asturiana Categoría:Muyeres escritores