Ángela García Cuetos ye una escultora asturiana. Foi una de les primeres artistes asturianes n'emplegar la cerámica como material artístico.
Trayeutoria García pasó la so infancia n'Asturies. A los 19 años treslladase a Madrid pa darréu viaxar a Londres (Reinu Xuníu) en 1963, onde vivió hasta 1970. Estudió mientres trés años, en parte becada pol Gobiernu inglés, nel Holborn Institute y nel Camden Institute of Arts de Londres. Nesta etapa, na que'l so interés centrose na cerámica, tuvo influyida pol escultor Henry Moore, y fizo la so primera esposición individual en 1969 na Galería Woodstock.
A la vuelta a España en 1970, instalose en Madrid y abrió'l so propiu taller d'escultura na cai Piamonte. Espuso individualmente per primer vegada na Galería Círculu 2, participando dende entós en munches esposiciones individuales y coleutives. Tres la folla entama trabayar el bronce, apaeciendo la so serie de torsos y cabeces, de los que son bona amuesa los presentaos na Galería Kreisler en 1977.
En 1980, al pie de la pintora y escultora Mariantonia Salomé, García foi una de los dos úniques escultores que participaron na II Bienal d'Arte Ciudá d'Uviéu, certame que tamién tuvo presencia femenina na figura de la pintora Consuelo Vallina. Nesta década, entamó trabayar nuna serie de semeyes y autorretratos, como son les cabeces de Alexander Fleming o Pablo Schabelsky. Anguaño, la escultora dedicase a la pintura acrílica ya'l dibuxu con plumiella a l'agua.
Especializada nel trabayu en bronce y piedra, anque tamién trabaya la cera y la cerámica, díxose de la so obra, figurativa y con referencies a la escultura clásica, que ye organicista y espresionista. Y, que magar nun ser de gran tamañu, destaca pola so rotundidá y espresividá .
Reconocencies En 1972, Ángela García Cuetos recibió'l Premiu Francisco Alcántara del Círculu de Belles Artes de Madrid. En 1985, recibió el Premiu Caxa d'Aforros de Madrid.
Bibliografía SÁNCHEZ PACHECO, Felicidá . Ángela . Madrid: Fernán-Gómez, 1987. ISBN 84-398-9165-2
Referencies
Enllaces esternos
Categoría:Escultores d'Asturies Categoría:Persones de Samartín del Rei Aurelio