Eladia García Palacios foi una maestra asturiana víctima de la represión franquista que foi condergada a muerte pol so compromisu políticu y social.
Biografía Nació na localidá asturiana de Xixón y yera fía de Valentina y Gaspar. Foi maestra d'un colexu particular de La Guía , na mesma ciudá. Tuvo un fíu.
Tres l'españíu de la guerra civil española, el 21 de xunetu de 1936 empezó a trabayar como cocinera na UXT. Collaboró cola delegación d'Instrucción Pública del Comité de Guerra de Xixón na requisa d'edificios relixosos para la organización de grupos escolares. En septiembre de 1936 convirtióse en directora de la escuela para probes Asilu Pola y del Patronatu San José de Xixón. Mientres los bombardeos sobro Xixón, encargose d'entamar les espediciones de los Neños de Rusia pa sacupar a los menores de la ciudá.
Formó parte de la última Comisión Executiva de l'Agrupación Socialista de Xixón como secretaria femenina y de FETE-UXT. Tamién militó n'ATEA, el sindicatu de la enseñanza y collaboró col diariu socialista Meyora, dirixíu pol periodista Javier Bonu.
Ingresó na cárcel d'El Cotu de Xixón. En 1937 foi condergada a muerte pol so compromisu políticu y social nún de los primeros conseyos de guerra que se celebraron nel Antiguu Institutu Xovellanos de Xixón. La so actividá como maestra foi una de les razones aducíes na so sentencia de muerte. Nella afirmábase que «inculcaba a les neñes l'odiu al fascismu» y familiarizábalos «coles idees de llibertá y emancipación» llevándoles a actos políticos nos qu'ella participaba. Acusaronla tamién d'espulsar a les monxes del Asilu Pola y de que «escarnecía a les autoridaes y ordes relixoses». Amás, la so amistá cola familia del políticu Belarmino Tomás foi otru de los argumentos utilizaos para la so condena.
El 29 d'avientu de 1937, a los 33 años d'edá, foi executada por fusilamiento xuntu con 4 homes más. El so cuerpu foi refundiáu a una fuesa común nel campusantu de Ciares en Xixón. A la so hermana Aurora García Palacios, -y conmutaron la pena capital pola de cadena perpetua .
Reconocencies El 14 d'abril de 2010, el so nome incluyose nel monolitu homenaxe asitiáu nel campusantu de Ciares de Xixón, nel que s'homenaxa a les 1.934 víctimes de la represión franquista na ciudá. Al añu siguiente, el Conceyu de Xixón aprobó denominar un parque col nome Xardinos de la Maestra Eladia García Palacios nel so honor.
En 2017, afayóse una placa enfrente del Muséu Nicanor Piñole, antiguu edificiu del Asilu Pola que García Palacios dirixó, n'homenaxe a les ocho muyeres represaliaes pol franquismu, entre avientu de 1937 y agostu de 1939, en Xixón . Na placa, amás del so nome, incluyéronse los d'Anita Orejas, Anita Vázquez Barrancúa, Estefanía Cueto Puertas, Belarmina Suárez Muñiz, Juana Álvarez Molina, Teresa Santianes Giménez y Máxima Vallinas Fernández.
Bibliografía Ortega Valcárcel, M. Enriqueta. 1994. La represión franquista n'Asturies. Executaos y finaos na cárcel del Coto , Xixón. Avilés. Azucel, D.L. 84-86546-51-6.
Referencies
Enllaces esternos
Categoría:Víctimes de la represión na zona franquista Categoría:Socialistes d'España Categoría:Sindicalistes de la Unión Xeneral de Trabayadores Categoría:Persones de Xixón