La Fiesta de les Bruxes de Barro (Fiesta de San Roque) ye una celebración popular y tradicional que tien llugar cada branu na pequeña llocalidá de Barro, nel conceyu de Llanes.

Na popular fiesta llanisca celébrase un homenaxe nel que mozos y moces del pueblu vístense como bruxes pa recitar un conxuru (1) alredor d’una foguera, a mou d’espectáculu prevíu a entamar la folixa.

Anque la fiesta ye conocida pola so popularidá nel conceyu, desconózse’l motivu real de lo que se celebra na fiesta de Les Bruxes.

Hai delles hipótesis y teoríes sobre l’orixe de la romería; la más conocida venceya esta fiesta cola historia d’Ana María García, “La Llobera”.

La lleenda diz asina:

Peles cais corren histories de muyeres acusaes de bruxería na dómina de la Inquisición, yá fora por cultivar plantes curatives, pola posesión de bienes o tierres que otros codiciaben, pola falta de protección o pola mera envidia.

Los xuicios de la Inquisición tán enllenos d’estos casos; destaca sobre toos el casu d’Ana María García, que foi la única muyer xulgada pola Inquisición nel Principáu d’Asturies.

La so infancia quedó marcada polos abandonos y los abusos, hasta que recibió la protección d’una bruxa que-y enseñó fechos y conxuros. Al traviés d’ellos dicíase qu’Ana podía manipular una manada de siete llobos que, según los llugareños, actuaben en perxuiciu del so ganáu si ella lo-yos pidía.

Tres la muerte de la bruxa, Ana pasó a convivir mientres dellos años con unos pastores trashumantes. Siendo ella una muyer guapa, de piel blanca y pelo rubiu, despertaba envidia n’otres muyeres, y al cabu d’un tiempu la muyer d’ún de los pastores denuncióla por bruxería.

Una vegada detenida pola Santa Inquisición, foi xulgada.

Entrugáron-y si yera verdá que convivía colos pastores, y ella afirmólo.

Entrugáron-y si viviera con una muyer considerada bruxa, y ella afirmólo.

Entrugáron-y tamién si tenía poder sobre los llobos, y ella afirmólo.

Por últimu, entrugáron-y si podía llamalos, y tres un silenciu incómodu, ella llevantóse, mirólos de frente y díxo-yos:

«Puedo facer apaecer dos equí, dos equí y trés equí», señalando a los llaos de los guardes y delantre d’ella.

Tola sala contuvo l’alientu. Ella dirixóse a los inquisidores y díxo-yos que nunca-yos mandara facer dañu a naide.

Tomaron el so tiempu y decidieron dexala en llibertá, cola condición de que nunca volviera por esos llugares, tal como consta nes actes del xuiciu.

Por eso, y pa celebralo, cada mes d’agostu celébrase en Barro la fiesta de Les Bruxes.

(1) N’esta nuechi de bruxes venimos a conceyar cual de nosotres será la qu’el juegu va a llevar. Cuando esti conceyu acabe, la bruxa mayor dirá de toes les concayestes que bruxa magostará. Prestes toes a jacer lo qu’el diablu nos ordene, comenzamos esti ritu al llaud’esta jogera.

Sapu, sapu que d’esti mundu nun te ves jartu.

Sapu, sapu; ya pues frayar y espatalixar que d’esti pote vivu nun vas a brincar.

¡Como se cose’l castañu, se vos seque el bon añu!

¡Como se secó el maizón, se vos seque el corazón!

El mal de güetu vos doi

Con estos aragüezos muertos, con sacaberas escorniadas y corazones de xáragos muertos.

Con bardios y con jortigues vos nazcan a tos verrugues y con grana de carvana se vos pierdan toes les jabes.

Entrañes de mirueyu tornau y el alma de un ajorcáu,

espíritus del otru mundu salii de los llamales del profundu.

Agua de mar, sidra del llar, ¡nun vos mováis de ahí, que vos vamos a matar!

Iréis tos a los avernos y en brases y en cenices os golveréis, como rechinen les portielles en los pernos así se mayaran los vuestros cuernos.

Si supieren les muyeres la virtú que tien la hiedra,

paceríenla por los muros como les vaques la hierba.

Si supiera la casada la virtú que tien la ruda trasnochara y madrugara a coxela con la lluna.

Sidra del duernu, demonios del avernu, corazón de perru, pluma de cuervu, rabu de conexu, pata de cangrexu, oreya de esperteyu; to n’esti pote mezclau y regüelto con un palo manzanal bebéilo a sorbiquinos pa ver a quien y jaz mal.

Cuatro luces, una caxa, muerte, lutu, calavera, el paraderu, la bruxa por munchu que coma y beba.

¡Ay San Roquin!

To e polvu, tien razón la bruxa vieya.

Por esu toes gritamos a un tiempu llevantando les escobes:

¡Viva el ruidu y el jolgoriu!

¡Viva San Roque y el perru!

¡Viva la sidra y la fiesta!

¡Muera la bruxa na joguera!