Mallorca ye una película, de ente 1932 y 1934 y descubierta en 2020, que recrea la música d'Isaac Albéniz al traviés de «pequeños trabayos cinematográficos». Dirixida por María Forteza, directora desconocida hasta'l descubrimientu del curtiumetraxe, considérase la primer película sonora dirixida por una muyer española y tien estructura típica de documental.

Importancia histórica Considérase que la so datación ye ente 1932 y 1934 debío a que'l so productor, Ramón Úbeda, afitó la so residencia en Barcelona en 1935 y ese mesmu añu rexistró una marca de soníu cinematográficu llamada Fono Palma, que tendría de figurar na película.

Si esta datación ye correcta, trataríase de la primer película sonora dirixida por una muyer n'España, siendo anterior a la película El gato montés (1935), dirixida por Rosario Pi. Enantes, la primer cineasta española de la etapa muda sería Helena Cortesina.

Descubrimientu El ficheru orixinal, fechu de nitratu, llevaba dende 1982 nos fondos de la Filmoteca Española en siendo catalogáu incorrectamente yá que formaba parte d'un llote con cintes de productores mallorquinos de los años 1920. Foi archivada como película muda. La so ficha dicía: «Producción: Balear Films, 1926. Descripción física: 8 minutos. Blanco y Negro con coloreados por filtros, Mudo 1:1,33; 35 mm. Equipo técnico: Dirección: Francisco Aguiló Torrandell».

La película foi presentada pola Filmoteca Española y VISU en mayu de 2020. Pudo vese n'abiertu na canal de la Filmoteca Española en Vimeo con una introducción de Cristina Andreu Cuevas, la presidenta de l'Asociación de Muyeres Cineastes y de Medios Audiovisuales.

Argumentu El filme integra imáxenes de distintos espacios de la islla de Mallorca con panorámiques descriptives o por aciu planos fixos del les foles del mar rompiendo na sablera. Tamién ufierta particulares encuadres del mar vistos al traviés de los arcos de la ciudá.

El guión del curtiu ye un percorríu per Mallorca, entrando pela puerta de Palma, percuerre les cais del barriu xudíu, l'Almudaina, la catedral de Santa María, el paséu de palmeres, el puertu , los patios… Sigue pola mariña, les cales y los montes.

Directora Nun se sabe nada de la directora, María Forteza, como afirma Josetxo Cerdán, director de la Filmoteca: «El so nome nun apaez na prensa de la dómina. Naide, ente los círculos de la historia del cine español o balear, paez conocela, nin asitiala en contestu».

Referencies

Enllaces esternos

Categoría:Películes en castellanu Categoría:Mallorca