O carabao (kalabaw en tagalo, kerbau en malaio), Bubalus bubalus carabanesis, é unha subespecie doméstica do búfalo acuático (Bubalus bubalis Linneo, 1758).
Encóntrase en Filipinas, Guam, Indonesia, Malaisia e noutros lugares do sueste asiático. É o animal de granxa por excelencia, usándose tanto para tirar do arado como dos carros usados para transportar os produtos agrícolas ao mercado.
Típico de Filipinas, é o animal símbolo do país e tamén de Guam, illa onde este animal foi introducido no século XVII polos españois.
Taxonomía
A clasificación dos búfalos acuáticos é incerta. Algunhas autoridades mencionan unha soa especie, Bubalus bubalis, con tres subespecies, o búfalo de río (B. bubalis bubalis) do subcontinente indio, o carabao ou búfalo de pantano (B. bubalis carabensis) de Filipinas e sueste de Asia e o arni ou búfalo acuático salvaxe (B. bubalis arnee).
Outros consideran que son especies estreitamente relacionadas, pero independentes, Bubalus bubalis, Bubalus carabanensis e Bubalus arnee, respectivamente.Roth, J. e P. Myers (2004): "Bubalis Bubalis". Universidade de Michigan. Museo de Zooloxía.
En 2003, a Comisión Internacional de Nomenclatura Zoolóxica (ICZN) ditaminou a favor de manter reunidos os búfalos acuáticos de pantano, e considerar un taxon separado para os búfalos de río, denominado Bubalus arnee, aínda que o uso antigo é aínda aceptábel para autores que o consideran conespecífico.
O búfalo acuático de pantano ten 48 cromosomas, mentres que o búfalo de río ten 50. Os dous tipos reprodúcense entre si, aínda que non facilmente, e poden producir descendencia fértil. Non se observou que se produzan híbridos con búfalos domésticos, e os embrións destes híbridos obtidos en laboratorio, non alcanzan a madureza.
Notas
Véxase tamén
Outros artigos Búfalo Búfalo de auga
Ligazóns externas Philippine Carabao Center Consultada o 14/5/2012.
Categoría:Bovinos Categoría:Animais domésticos Categoría:Símbolos de Filipinas