Roberto Trashorras Gayoso, nado en Rábade o 28 de febreiro do 1981, é un exfutbolista e adestrador galego. Xogaba de centrocampista e disputou máis de 600 partidos durante a súa carreira, 171 deles na Primeira División, categoría na que debutou coa camiseta do FC Barcelona, pero na que viviu os seus mellores anos militando no Rayo Vallecano, no que xogou durante sete tempadas e do que foi capitán.

Traxectoria Como futbolista Inicios Nacido no concello lugués de Rábade, con 8 anos ingresou nas categorías inferiores do Racing Vilalbés, da localidade próxima de Vilalba, onde seu pai traballaba nun banco. Axiña comezou a destacar no club verde e vermello, xogando en categorías superiores ás da súa idade, e espertou o interese do FC Barcelona, que o incorporou á súa canteira con 14 anos.

FC Barcelona En abril de 1999 debutou co Barcelona C na Terceira División, nun encontro ante o Mataró no que entrou ao campo na segunda parte como substituto de Jito. Xogou un segundo partido co segundo filial, marcando un gol, e na tempada seguinte subiu ao Barcelona B, da Segunda División B. Militou no primeiro filial durante catro tempadas, disputando máis dun cento de partidos, e destacando especialmente na 2001/02, na que contribuíu con 15 goles a que o equipo se proclamase campión do grupo II. Durante a súa etapa no Barcelona B, o adestrador vigués Quique Costas atrasou a súa posición de dianteiro centro e recolocouno como mediapunta, debido ás numerosas asistencias que repartía.

O seu bo facer no filial propiciou que Carles Rexach o chamase para realizar a pretempada co primeiro equipo no verán do ano 2001. O 8 de agosto realizou o seu debut co primeiro equipo, nun partido de clasificación para a Liga de Campións ante o Wisła Kraków, no que disputou os minutos finais en substitución de Luis Enrique. Dous meses despois xogou o seu primeiro partido na Primeira División, un encontro fronte ao Deportivo da Coruña no que saltou á herba de Riazor no treito final substituíndo a Alfonso Pérez.

Real Madrid Castilla No ano 2003 deixou o Barcelona B para fichar polo filial do eterno rival, o Real Madrid Castilla, tamén da Segunda B. Militou no club branco durante dúas tempadas, nas que disputou 75 partidos e marcou 14 goles, e logrou na segunda delas o ascenso á Segunda División.

Numancia En outubro de 2005 fichou polo Numancia, co que disputou 12 encontros da Segunda División e marcou o seu primeiro gol na categoría, diante do Poli Ejido.

Las Palmas Durante o verán do 2006 tivo ofertas de equipos estranxeiros, mais non aceptou ningunha, polo que quedou sen equipo ata que en outubro fichou pola UD Las Palmas, que ocupaba os últimos postos da Segunda División. Fíxose axiña coa titularidade no equipo amarelo e na súa primeira tempada contribuíu con 8 goles á salvación do equipo, mentres que na seguinte rematou na oitava posición.

Celta de Vigo En 2008 foi contratado polo Celta de Vigo, tamén en Segunda División, sendo a súa primeira tempada no club celeste moi irregular en canto a xogo e eficacia goleadora. A situación mudou na tempada 2009/10, na que con Eusebio Sacristán como adestrador, converteuse no cerebro e líder do Celta e anotou nove goles en liga, o último deles ante a UD Las Palmas de penalti. Ademais sumou catro goles máis na Copa do Rei, competición na que o club galego acadou os cuartos de final.

Continuou como titular na tempada 2010/11, na que disputou a promoción de ascenso a Primeira, e pechou o seu paso polo Celta con 119 partidos e 21 goles. No verán de 2011 o club decidiu traspasar o xogador para aforrar o seu alto salario e tentar a incorporación de Jonathan Pereira ou Iago Falque. Afastado do equipo por Paco Herrera, finalmente o seu contrato foi rescindido e o 11 de agosto anunciouse a súa fichaxe polo Rayo Vallecano, da Primeira División.

Rayo Vallecano Militou no Rayo durante sete tempadas, as cinco primeiras na máxima categoría, sendo un fixo nas aliñacións titulares de Paco Jémez, que levou o equipo aos mellores resultados da súa historia, incluído unha oitava praza na tempada 2012/13. Durante dúas tempadas foi o xogador con máis pases realizados da liga, por diante de futbolistas como Xavi ou Toni Kroos, e foi o capitán do equipo dende 2013. Acabou por descender en 2015, pero recuperou a categoría na tempada 2017/18, na que se proclamou campión de Segunda.

Disputou un total de 218 partidos co club madrileño, nos que anotou 8 goles.

O 29 de agosto de 2018 anunciou a súa retirada como futbolista, con 37 anos de idade, despois de máis de 600 partidos, 171 deles na Primeira División.

Selección nacional Foi internacional coas diferentes categorías inferiores da selección española, dende a sub-16 ata a sub-20, disputando un total de 24 partidos internacionais. No ano 2005 foi un dos futbolistas que participou no histórico regreso da selección galega ante o Uruguai en San Lázaro. Disputou ademais os tres seguintes partidos da Irmandiña, contra Ecuador, Camerún e Irán.

Como adestrador En xullo de 2021, tres anos despois de colgar as botas, comezou a súa carreira como adestrador, dirixindo o equipo xuvenil B do Lugo, na Liga Nacional. Para a tempada 2022/23 colleu as rendas do Polvorín, que viña de ascender á Segunda División RFEF con Álex Ortiz como adestrador. Deixou o equipo ao remate da tempada, tralo descenso do equipo, pero foi contratado de novo seis meses despois, para substituír o cesado Roberto Fernández. Dous meses despois foi nomeado adestrador do primeiro equipo, trala destitución de Paulo Alves, converténdose así no terceiro técnico da tempada no conxunto lucense. Chegou ao primeiro equipo co obxectivo de reverter o rumbo e loitar polo ascenso á Segunda División, pero non só non o conseguiu, senón que o club acabou mudando o seu obxectivo á permanencia na categoría. Ao remate da competición o club anunciou que non seguiría para a vindeira campaña.

Palmarés Barcelona B Segunda División B (1): 2001/02.

Real Madrid Castilla Segunda División B (1): 2004/05.

Rayo Vallecano Segunda División (1): 2017/18.

Notas

Véxase tamén

Ligazóns externas Datos do xogador en bdfutbol.com

Categoría:Nados en 1981 Categoría:Nados en Rábade Categoría:Futbolistas de Rábade Categoría:Centrocampistas de fútbol Categoría:Xogadores do FC Barcelona B Categoría:Xogadores do FC Barcelona Categoría:Xogadores do Real Madrid Castilla Categoría:Xogadores do CD Numancia Categoría:Xogadores da UD Las Palmas Categoría:Xogadores do Celta de Vigo Categoría:Xogadores do Rayo Vallecano Categoría:Xogadores da selección de fútbol de Galicia Categoría:Xogadores do Celta de Vigo internacionais coa selección de fútbol de Galicia Categoría:Xogadores da selección de fútbol de España sub-19 Categoría:Adestradores de fútbol de Galicia Categoría:Adestradores do CD Lugo B Categoría:Adestradores do CD Lugo