José Alonso López Nobal, nado en Ferrol o 2 de novembro de 1763 e finado na mesma cidade o 26 de decembro de 1824, foi un enxeñeiro e político galego.
Traxectoria Fillo de Fernando Alonso e María de Nobal, orixinarios de Ortigueira. Con formación técnica en navegación e enxeñaría civil, foi piloto naval, e profesor da Escola de Gardamariñas de Ferrol. En 1804 asinou a Memoria sobre construcción de una carretera en Galicia.
En 1807 escribiu Reflexiones sobre España. En xaneiro de 1810 foi designado vogal da Xunta Superior de subsidios, armamento e defensa de Galicia e seis meses despois foi elixido deputado das Cortes de Cádiz polo distrito de Betanzos. Presentou 35 propostas relacionadas co sistema fiscal, a abolición dos señoríos e exaccións eclesiásticas, como a Ofrenda ou Voto de Filipe IV e o Voto de Santiago. Foi membro de varias comisións, como as de Guerra, Mariña e Facenda.
Tras o regreso de Fernando VII traballou no Bierzo. En 1820 publicou un estudo, de seis tomos, titulado Consideraciones generales sobre varios puntos históricos, políticos y económicos, a favor de la libertad y fomento de los pueblos y noticias particulares de esta clase, relativos al Ferrol y su comarca. Durante o trienio liberal foi de novo deputado por Galicia nas lexislaturas ordinarias de 1820 e 1821 e na extraordinaria de 1821-1822. Despois foi tenente alcalde do Concello de Ferrol.
Véxase tamén Bibliografía
Balás Silva, Emiliano (1905). "Noticias biobibliográficas del polígrafo ferrolano D. José Alonso López". Anuario de las conferencias y debates del Ateneo Ferrolano en el Curso de 1904-1905, pp. 33-114.
Ligazóns externas
Categoría:Nados en Ferrol Categoría:Nados en 1763 Categoría:Finados en 1824 Categoría:Enxeñeiros de Galicia Categoría:Deputados de Galicia no Congreso dos Deputados Categoría:Personalidades de Galicia sen imaxes