miniaturadeimagen|384x384px|Mapa climáticu d'América del Sur, según el sistema Köppen-Geiger, pal periodu 1980-2016. La Diagonal ta espeyada pola franxa de terrenu de clima BWh y BWk que va del ecuador al sur de la Patagonia. La Diágonal Árida d'América del Sur ye una zona contigua de clima áridu y semiáridu que traviesa América del Sur dende la costa de Perú, nel noroeste, hasta la Patagonia arxentina al sureste, ya inclúi amplies fasteres de Bolivia y Chile. La Diagonal Árida abarca dellos desiertos: los de Sechura, Atacama, Monte y Patagónicu. La Diagonal separta les viesques templaes y subtropicales de Chile ya'l sur d'Arxentina de les otres viesques del socontinente. La Diagonal, xunto coles glaciaciones cuaternaries nos Andes meridionales, ye la responsable de la distribución de la vexetación de Chile ya Arxentina.
El conceptu, magar que la mayoría de les obres qu'estudien esta rexón nun lo reconozan, foi enunciáu per primer vegada pol xeógrafu francés Emmanuel de Martonne nel so llibru de 1935 Problème des régions arides Sud-Américaines. Pa elli la Diagonal estendíase dende Antofagasta, al norte de Chile, hasta la costa septentrional de la Patagonia arxentina. Más sero, otros autores como Margarita González Loyarte (1995) estendiéronla hasta la costa del Perú septentrional.
Causa y orixe La porción septentrional de la Diagonal Árida ye'l resultáu del bloquéu de los vientos alisios pola barrera formada polos Andes Centrales y l'anticiclón del Pacíficu Sur. Más al sur, na rexón dominada polos vientos del oeste, la solombra orográfica que los Andes Meridionales proyecten sobre la Patagonia oriental bloquea de forma asemeyada la humedá. Al sur de Mendoza (32°53' S) la fastera más seca de la Diagonal sepártase de los Andes a midida que los montes van perdiendo altura, lo que permite que pase della humedá; de resultes, nes llatitúes más meridionales les partes más seques de la Diagonal tán na costa atlántica de Patagonia.
La Diagonal esiste dende'l neoxenu. L'orixe de l'aridez de la parte septentrional de la diagonal ta venceyada a dos sucesos xeolóxicos:
la elevación de los Andes, que provocó un bloquéu tantu del fluxu en sentiu oeste de la humedá a lo llargo los trópicos como'l fluxu en sentíu este de la humedá na Patagonia; la intrusion permanente d'agües fríes del Antárticu (la corriente de Humboldt) na costa oeste d'América del Sur.
Referencies
Enllaces esternos
Categoría:Xeografía d'América del Sur