Chenta Tsai Tseng , más conocíu pol so nome artísticu Putochinomaricón, ye un cantante, músicu, arquiteutu, artista multimedia y activista español, fíu d'inmigrantes taiwaneses. Entamó la so carrera en 2018, col llanzamientu del so primer LP, Corazón de cerdo con ginseng al vapor, en formatu dixital amás d'una escasa tirada en físicu. En mayu de 2019 espublizó'l so segundu trabayu, Miseria Humana.
Biografía y carrera artística Chenta Tsai nació en Taiwán pero treslladóse colos sos pás a España con once meses, onde creció nel madrilanu barriu de Vallecas. La so familia caltúvolu siempres dientro la so comunidá, pola mor l'habitual estigma escontra la comunidá asiática como colonizadora. Parte del so oxetivu ye precisamente, como diz, ocupar espacios tradicionalmente negaos a persones como él.
Llueu interesóse pel mundiu la música y aportó al Conservatoriu, cursando violín hasta los 21 años. Nel añu 2017 llegaría la so irrupción definitiva na música y la nacencia de Putochinomaricón, de la mano de Elefant Records. El 19 de febreru de 2017 espubliza na so canal de YouTube el tema Gente de mierda, el so cantar más viral y tou un desafuego contra l'acoso de too tipu, qu'él mesmu soportó.
El 20 d'abril de 2018, sale al mercáu'l so primer discu, Corazón de cerdo con ginseng al vapor. El 10 de mayu de 2019 sale'l segundu, Miseria Humana, que sigue na llinia del anterior anque añadiendo otros xéneros nuna especie de mixtape, ensin una clara cohesión estilística, anque tampoco intención de tenela.
Desarrolló tamién la so faceta como actor, participando na webserie Looser, dirixida por Esty Quesada, en 2018.
Estilu musical y activismu Tsai basa'l so conceutu artísticu nun analís alredor de la so condición d'inmigrante y d'homosexual, d'ende'l so llamatu Putochinomaricón. Fai una reapropiación d'estos trés calificativos, usaos con intención discriminatoria escontra les persones de los dos coleutivos a los que pertenez Tsai.
Sicasí, fai una dura crítica a la comunidá LGTB actual, a la que lloma de "racista y plumófoba". Amosóse allegáu a les idees del Arguyu Crítico, que promueven la recuperación del sentíu reivindicativu y de protesta del Arguyu, refugando'l capitalismu rosa. Participa coles mesmes na organización SOS Racismu.
Declara como referentes a personalidaes como la cantante Charli XCX o'l diseñador Gosha Rubchinskiy, amás d'a personaxes d'Internet como Esty Quesada. La so música básase nel pop electrónicu, anque esploró otros soníos, sobromanera nel so últimu discu, Miseria Humana, nel que s'aprecien clares reminiscencies punk rock o inclusive otres del dance hall ya'l trap d'otros talentos mozos del panorama musical español como Bad Gyal. El calter y soníu de les sos composiciones podría comparase con proyeutos de la escena indie española enmarcaos nel términu subnopop o electrodisgusting, como Las Bistecs, Ladilla Rusa, Samantha Hudson o Ojete Calor; anque Tsai prefier nun identificase con estos términos.
Per otru llau, cal mentar que nengún de los sos temes hasta la fecha supera los trés minutos de duración, nada casual dientro'l so conceutu artísticu, que s'alimenta de la cultura mainstream y l'enclín a la inmediatez de les redes sociales. Anque tampoco-y falten crítiques a estes nueves formes de comunicación, por casu, a una cierta sobreactuación en redes, al activismu falsu que se fai tres la pantalla y non na cai, l'adicción a Internet o la sobrecarga d'información y d'opiniones, dacuando dando como resultáu una fonda desinformación.
Discografía Publicó hasta güei dos álbumes d'estudiu, anque la so estratexa de distribución céntrase'n YouTube, onde publicáronse tos los sos cantares en primicia enantes llegar a les plataformes de streaming. Dalgunes, como Marika Pikapika, solo fueron publicaes en esta plataforma. En total, 17 cantares compuestos y producíos por él mesmu y publicaes sol sellu indie Elefant Records.
Cenciellos 2018: Gente de mierda 2018: El test de la Bravo y la Superpop 2019: Doble tic azul 2019: Deporte nacional 2019: Tu no eres activista
Álbumes d'estudiu
2018: Corazón de cerdo con ginseng al vapor 2019: Miseria Humana
Filmografía
Televisión AñuSerieRolNotes2018LooserChico TerapiaEpisodiu «Marco Polo»
Referencies
Enllaces esternos Páxina oficial del cantante Páxina del artista en Spotify
Categoría:Cantantes en castellanu Categoría:Cantantes de pop d'España Categoría:Persones de Taipéi