Ugné Karvelis foi una escritora, crítica lliteraria, traductora y diplomática lituana. El so trabayu como editora de la editorial francesa Gallimard foi fundamental pal espardimientu en Francia de la lliteratura llatinoamericana y d'Europa Oriental. Foi compañera sentimental de Julio Cortázar, representante lliteraria y divulgadora de la so obra n'Europa.
Biografía Ugné Karvelis nació en Noreikiškės, cerca de Kaunas, y los sos padres fueron el políticu Petras Karvelis (Ministru de Rellaciones esteriores de Lituania de 1925 a 1929) y l'activista cultural Veronika Bakštyte. La familia Karvelis emigró a Alemaña en 1944.
En 1940 ingresó al Sacre Coeur de Berlín, al Kaunas Aušra Gymnasium (1943-1944) y a la Escuela Francesa de Tubinga (1945-1950). Estudió en La Sorbona (1951-1952) y depués nel Departamentu de Rellaciones Internacionales del Institutu d'Estudios Políticos de París, de 1952 a 1956. Prosiguió los sos estudios na Universidá de Columbia de Nueva York, nos departamentos d'Historia y d'Economía (1957-1958).
En 1955 empezó a trabayar pa la revista L'Express nel so Departamentu de Rellaciones Internacionales. De 1959 a 1983 foi editora d'Éditions Gallimard, onde empezó como direutora del departamentu Internacional, y depués dirixó los departamentos p'América Llatina, España, Portugal y Europa Oriental. Gracies a ella fueron publicaos en Francia dellos autores de gran importancia como Julio Cortázar, Alejo Carpentier, Carlos Fuentes, Pablo Neruda, Octavio Paz, Mario Vargas Llosa, Milan Kundera y Vassilis Vassilikos. Tamién foi crítica lliteraria de Figaro Littéraire, suplementu lliterariu de Le Figaro, y de Le Monde.
En 1988 Karvelis visitó Lituania y en 1991 ayudó al so país a ingresar na UNESCO. En 1993 foi designada Embaxadora Permanente de Lituania na UNESCO.
Tradució la obra de dellos autores lituanos al francés: noveles de Saulius Tomes Kondrotas, Ricardas Gavelis, Bite Vilimaite y Jurga Ivanauskaite; poemes clásicos de Kristijonas Donelaitis, Maironis, Balys Sruoga, Salomeja Neris, Vincas Mykolaitis-Putinas y Jonas Aistis; poemes d'autores modernos de Marcelijus Martinaitis, Eduardas Mieželaitis, Justinas Marcinkevicius, Sigitas Geda, Antanas A. Jonynas, Gintaras Patackas y Almis Grybauskas ente otros.
La rellación que dende 1967 a 1978 caltuvo con Julio Cortázar, foi decisiva na politización del pensamientu, los escritos y les actividaes públiques del escritor.
Obres Demain, il n'y aura plus de trains, 1991, novela (Traukiniu daugiau nebus, 1997).
Referencies
Enllaces esternos Biografía de Ugnė Karvelis
Categoría:Escritores de Lituania Categoría:Críticos y crítiques de lliteratura de Lituania Categoría:Editores de Lituania Categoría:Diplomáticos y diplomátiques de Lituania Categoría:Traductores de Lituania Categoría:Traductores del lituanu Categoría:Traductores al lituanu Categoría:Julio Cortázar Categoría:Persones de Lituania