José Francisco Uría y Riego foi un políticu asturianu.
Biografía Llicenciáu en Filosofía y Xurisprudencia na Universidá d'Uviéu. Yá en Madrid desempeña dellos cargos nel Ministeriu de la Gobernación, y ente xunetu y ochobre de 1856 ocupa la secretaría de Gobiernu d'Uviéu. Foi nomáu Gobernador Civil de Logroño n'agostu de 1856, pero nun puede tomar posesión por motivos de salú y finalmente en payares de 1857 ocupa'l puestu de secretariu de Gobiernu de Madrid. En 1857 entra en política de la mano d'Unión Lliberal y resulta escoyíu diputáu por Cangas de Tinéu. El presidente del Gobiernu, O'Donnell, nómalu direutor xeneral d'Obres Públiques en 1858, siendo ministru de Fomentu Rafael de Bustos y Castilla-Portugal. Dende esti puestu favorez dellos proyeutos d'infraestructures n'Asturies, ente ellos la llinia de ferrocarril ente Payares y Xixón. Tien que dexar el cargu por motivos de salú nel mes d'avientu del mesmu añu.
Collaboró col periódicu El Faro Asturiano y escribió la Memoria sobre el estado de las obras públicas en España al finalizar el primer semestre de 1859 (Madrid, 1859). Foi vicesecretariu de la seición d'Arte y Lliteratura del Atenéu Científico y Lliterario de Madrid. Tou ello, mereció la reconocencia de dellos conceyos asturianos (Xixón, Cangas, Ḷḷuarca) que recueyen nel so caleyeru una cai dedicada a la so memoria. N'Uviéu, la principal arteria comercial de la ciudá, la cai Uría lleva'l so nome. Morrió n'Alicante'l 24 de marzu de 1862.
Bibliografía
Referencies
Enllaces esternos
Categoría:Políticos y polítiques d'Asturies Categoría:Alumnáu de la Universidá d'Uviéu Categoría:Persones de Cangas del Narcea