El Campeonatu d'Europa de Saltos de la FEI ye la más importante competición europea dientru de la especialidá de saltos. Celébrase dende 1957 y la so organización cuerre a cargu de la Federación Ecuestre Internacional (FEI). De forma paralela a esti campeonatu, fáense anguaño otros pa xinetes mozos, xuveniles, neñes y neños, veteranos, ponis... Anguaño ye una competición mesta pero de 1957 a 1973, cuando nun yera común qu'homes y muyeres participaran nos campeonatos hípicos xuntos, les competiciones femenina y masculina facíense de manera dixebrada.

Dende l'añu 1967 el campeonatu fáese cada dos años y dende 1975, amás de la competición individual tamién tien llugar una competición d'equipos na que participen seleiciones nacionales. La edición de 2009, celebrada en Windsor (GBR), organizóse per primer vegada al mesmu tiempu que'l Campeonatu d'Europa de Doma de la FEI. Nel añu 2013 los campeonatos d'estes dos disciplines volvieron a facese de forma conxunta, nesti casu n'Herning (DNK). En 2015 n'Aquisgrán (DEU) los campeonatos d'Europa de cinco disciplines hípiques distintes (saltu, doma, voltéu, enganches y reining) compartieron escenariu por vez primera. Pal añu 2017 van coincidir en Gotemburgu (SWE) los de saltu, doma, doma adautada y enganches.

El campeonatu tien de facese al aire llibre y, por norma xeneral, una mesma federación nacional nun lu organizará dos vegaes siguíes.

Alemaña ye'l país con más títulos (14 individuales y 7 por equipos) y con más medayes (49 en total: 33 individuales y 16 por equipos). Los xinetes David Broome (GBR) y Paul Schockemöhle (DEU) son los que más campeonatos individuales tienen, tres caún d'ellos. Por equipos, los que tienen el mayor númberu de títulos son Michael Whitaker (GBR) y Ludger Beerbaum (DEU), con cuatro caún.

Seleición de participantes Les federaciones nacionales son les encargaes de facer la convocatoria pal campeonatu, tando los equipos formaos por un mínimu de tres xinetes y tres caballos y un máximu de cinco xinetes y diez caballos. El xefe de caún de los equipos tien qu'escoyer, enantes d'entamar la primer prueba del campeonatu, los participantes finales (tres o cuatro binomios xinete-caballu) que competirán nun solo a nivel d'equipu sinón tamién individualmente.

Les federaciones que nun algamen a facer equipu puen convocar pal campeonatu a ún o dos xinetes, con ún o dos caballos caún. El xefe d'equipu va ser tamién l'encargáu d'escoyer a los binomios finales, que van participar na más qu'a nivel individual.

En tolos casos na más que son escoyibles caballos d'ocho o más años y xinetes mayores de 18 años (o que vayan cumplilos nel añu del campeonatu). Amás tanto unos como otros, anque nun ye necesario que como pareya, tienen que tener un certificáu de capacitación que consigue'l xinete o caballu que completara... ... con ocho o menos puntos un recorríu na competición por equipos del anterior Campeonatu d'Europa, del anterior Campeonatu del Mundu o de los anteriores Xuegos Olímpicos. ... un recorríu de la tercer competición individual del anterior Campeonatu del Mundu o de la final individual del anterior Campeonatu d'Europa o de los anteriores Xuegos Olímpicos. ... un recorríu de la primer ronda d'una competición de la Copa del Mundu de la FEI nun CSI1*, CSI2* o CSI3* seleicionáu ensin penalizaciones o nun CSI4* o CSI5* seleicionáu con ocho puntos o menos. ... un recorríu na primer ronda d'un Gran Premiu nun CSI3* ensin penalizaciones o nun CSI4* o CSI5* con ocho puntos o menos. ... con cuatro o menos puntos un recorríu de la primer o segunda ronda d'una Copa de Naciones nun CSIO3* o CSIO4* seleicionáu o de la primer ronda d'un Gran Premiu d'esos mesmos CSIO. ... con ocho o menos puntos un recorríu de la primer o segunda ronda d'una Copa de Naciones d'un CSIO 5* y de la primer ronda del Gran Premiu nesi mesmu eventu.

Los CSI y los CSIO válidos son espublizaos pola FEI l'añu enantes del campeonatu. Pa ser válides pa consiguir el certificáu nomáu arriba, les competiciones de Copa del Mundu de la FEI, Copa de les Naciones y los Grandes Premios tienen que cumplir coles regles establecíes pola FEI.

En casos esceicionales la FEI pue organizar competiciones pa la capacitación d'atletes de les federaciones pa les que seya imposible capacitar a los sos xinetes según el métodu ordinariu.

Formatu del campeonatu La FEI establez nes sos regles les carauterístiques de los recorríos de caúna de les competiciones y el númberu y formatu d'estes. Anguaño son tres les pruebes que componen el campeonatu: les dos primeres van cuntar tanto pa la clasificación individual como pa la clasificación por equipos, mientres que la tercera tiense na más en cuenta pa la clasificación individual.

Los miembros de los tres primeros clasificaos na competición por equipos y los tres primeros xinetes clasificaos na competición individual reciben una medaya d'oru, de plata o de bronce, según seyan primeros, segundos o terceros. Amás, l'equipo ganador de la medaya d'oru va nomase Campeón d'Europa por Equipos asina como'l ganador de la medaya d'oru individual, que será nomáu Campeón d'Europa.

Primer prueba La primer prueba, que ye parte del campeonatu individual y del campeonatu por equipos, ye xuzgada baxo la Tabla C del reglamentu de la FEI. En casu d'igualdá de tiempos, nun hai recorríu de desempate.

En primer llugar van participar los binomios que lo faen na más qu'individualmente, según l'orde que'l sortéu determinara. Tres d'ellos participará un binomiu de caún de los equipos (l'orde de los equipos determínase tamién nun sortéu) hasta completar cuatro tandes, con un binomiu distintu de cada equipu en cada tanda.

Los resultaos de caún de los binomios conviértense en puntos multiplicando'l so tiempu por 0,5 redondeando'l resultáu a dos decimales. Al que tenga menor resultáu dánse-y cero puntos y al restu la diferencia tres de la conversión ente esi menor resultáu y el de so. Si un binomiu ye elimináu o nun completa'l so recorríu, la so puntuación será venti puntos mayor que la del peor binomiu que terminara'l recorríu.

La puntuación nesta prueba de caún de los equipos ye la suma de les puntuaciones de los tres meyores clasificaos del equipu.

Segunda prueba La segunda prueba consiste en dos rondes que son xuzgaes, ensin reló nin recorríu de desempate, baxo la Tabla A del reglamentu de la FEI. Los recorríos de les dos rondes van ser iguales. Igual que la primer prueba, tamién esta ye parte de los campeonatos individual y por equipos.

Ronda 1 Nesta ronda participen los mesmos binomios que na primer competición. Primero los que lo faen na más qu'individualmente, n'orde inversu de clasificación; dempués los equipos, tamién n'orde tamién inversu al de la clasificación y en cuatro tandes pero dividíos en dos grupos: el primeru colos equipos dende'l caberu fasta'l 11ᵘ y l'otru colos equipos del 10ᵘ al 1ᵘ.

Clasificación individual: súmense los puntos de la primer prueba y d'esta primer ronda de la segunda prueba pa caún de los binomios, y ordénense de menor a mayor puntuación. Los cincuenta meyores (y los empataos na plaza númberu 50 si los hai) clasifíquense pa la segunda ronda d'esta segunda prueba.

Clasificación por equipos: súmense los puntos de la primer prueba y los puntos de los tres meyores binomios del equipu nesta primer ronda de la segunda prueba. Ordénense los equipos de menor a mayor puntuación y los diez primeros clasifíquense pa la segunda ronda (final por equipos).

Ronda 2 Nesta segunda ronda participen primero los binomios clasificaos a nivel individual ensin equipu y de los equipos nun clasificaos pa esta ronda, n'orde inversu de clasificación. Dempués, en cuatro tandes y tamién n'orde inversu de clasificación, un binomiu de caún de los diez equipos finalistes. El resultáu de los binomios d'estos equipos va cuntar pal campeonatu por equipos y pal individual, nos casos en que'l binomiu tea ente los clasificaos dende la ronda anterior, y na más que pal campeonatu por equipos nel restu de los casos.

Clasificación individual: súmense los puntos de la primer prueba y de les dos rondes de la segunda prueba pa caún de los binomios, y ordénense de menor a mayor puntuación. Los venticinco meyores (y los empataos nel puestu 25) clasifíquense pa la tercer prueba.

Clasificación por equipos: súmense los puntos acumulaos por cada equipu na primer prueba y na primer ronda d'esta segunda prueba y los puntos de los tres meyores binomios del equipu nesta segunda ronda. Ordénense los equipos de menor a mayor puntuación. El meyor de los equipos ye proclamáu Campeón d'Europa por Equipos. En casu d'empate en dalgún de los tres primeros puestos, los equipos empataos tienen de saltar un recorríu de desempate (coles carauterístiques y de la forma que recueyen les normes de la FEI). Si l'empate ye pa los puestos del 4ᵘ al 10ᵘ, los equipos empataos comparten puestu.

Tercer prueba La tercer competición consiste en dos rondes que son xuzgaes, ensin reló nin recorríu de desempate, baxo la Tabla A del reglamentu de la FEI. Caúna de les dos rondes tien un recorríu distintu. Esta competición pertenez únicamente al campeonatu individual y participen los venticinco binomios clasificaos que completaran la segunda prueba ensin retirase o ensin ser eliminaos. Caltiénense cinco reserves por si dalgún de los venticinco finalistes nun pue participar nesta prueba.

L'orde de salida a pista na ronda A ye inversu al de clasificación. A los puntos que caún de los binomios acumulare nes dos primeres pruebes súmense los puntos de la ronda A, ordenándose otra vuelta de menor a mayor puntuación tolos finalistes. Na ronda B los binomios van participar tamién n'orde inversu según esta última clasificación.

Na clasificación final ordénense los binomios de menor a mayor puntuación, dempués de sumar los puntos de caún d'ellos en caúna de les tres pruebes. El primer clasificáu ye nomáu Campeón d'Europa. En casu d'empate en dalgún de los tres primeros puestos, los binomios empataos tienen de saltar un recorríu de desempate fechu con ocho de los ostáculos de les rondes A y B.

Medayistes Individuales