Eulogio Díaz-Miranda y Arias de Velasco foi un políticu asturianu, miembru del partíu progresista.
Biografìa Ñaz na casa solariega d’El Pontigo. Foi un políticu asturianu de tendencia progresista y desempeñó delles vegaes el cargu d’alcalde de Grau. Tamién foi diputáu nes Cortes Ordinaries y gobernador civil d’Asturies en 1868.
El so ambiente familiar taba marcáu por dos tradiciones polítiques distintes: el so padre, Jacinto Díaz-Miranda, taba comprometíu colos ideales lliberales y constitucionales de les Cortes de Cádiz, mentes que la familia de la so madre tenía vínculos col carlismu. Esta combinación d'influyencies llevó a Eulogio a exercer un papel de puente ente les corrientes lliberales y más conservadores.
Participó activamente na política asturiana del sieglu XIX y apoyó distintos movimientos que precedieron a la Revolución de 1868. Tamién tuvo una intervención destacada na defensa de les milicies nacionales de Grau y nel desarrollu del movimientu unionista. Como diputáu, promovió diverses obres d’infraestructura n’Asturies, ente elles el puertu de Xixón, carreteres, la conexión ferroviaria ente Sama de Llangréu y Xixón y el treslláu del xulgáu de primer instancia de Belmonte de Miranda a Grau. Tamién amosó interés pola enseñanza y dexó una manda testamentaria pa la construcción d’escueles en Sama de Grau.
Casóse en 1840 con Manuela Arango y Laguna y tuvieron siete fíos. Nos sos últimos años volvió participar na vida política asturiana y collaboró na reorganización del Partíu Lliberal d’Asturies. En 1892 encargóse de preparar la visita de Sagasta al Principáu. Morrió en 1894 y foi enterráu, sigún el so deséu, en Sama de Grado; más tarde los sos restos treslladáronse a la capiella de la casa solariega d’El Quintanal, en Vayu.
Referencies
Categoría:Alcaldes y alcaldeses d'Asturies