Mindar, conocíu tamién como Android Kannon Mindar, ye un androide budista instaláu nel templu Kōdai-ji de Kioto, en Xapón. Foi desarrolláu por un comité formáu pol templu en collaboración con investigadores de robótica de la Universidá d'Osaka y presentóse públicamente en 2019.«The Unveiling of and Delivery of a Buddhist Sermon by Mindar – The Android Kannon», Kōdai-ji Zen Temple, 23 de febreru de 2019. El robot representa a Kannon, bodhisattva de la compasión nel budismu d'Asia oriental.
El proyeutu empezó en setiembre de 2017 cola intención d'esplorar una nueva forma de representación de les figures budistes. Mindar presenta una cabeza, cara y manes cubiertes con materiales que simulen la piel, mentanto gran parte de la estructura mecánica del torso y los brazos queda visible. El diseñu foi realizáu con participación del equipu del roboticista Hiroshi Ishiguro, conocíu polos sos trabayos sobre androides d'apariencia humana.
Mindar foi programáu pa pronunciar un sermón basáu nel Sutra del Corazón, ún de los testos más conocíos del budismu mahayana. Según Kōdai-ji, el discursu pretende esplicar en términos accesibles el conteníu de los 262 caracteres de la versión china del sutra y presenta'l robot como una nueva etapa na tradición histórica de representar les enseñances budistes mediante imáxenes y escultures. La presentación combina'l discursu del androide con proyecciones, música y traducciones.
La primer presentación pública realizóse'l 23 de febreru de 2019 nel templu Kōdai-ji. La combinación d'una institución relixosa fundada nel sieglu XVII con un androide contemporaneu tuvo una amplia repercusión internacional y convirtió Mindar nun casu d'estudiu sobre la rellación ente robótica, relixón, ritual y comunicación. El templu defendió'l proyeutu como una continuación de les formes utilizaes históricamente pa tresmitir les enseñances budistes a públicos de distintes dómines.
Referencies
Enllaces esternos Información de Mindar en Kōdai-ji
Categoría:Robots humanoides Categoría:Androides