La Carniola Seca (n', n') ye una pequeña zona situada na parte noroeste de la Baxa Carniola, n'Eslovenia. El nome "secu" fai referencia a la sequedá de la rexón.

Historia La rexón tuvo habitada enantes polos ilirios, que fueron conquistaos polos celtes nel sieglu IV a.C. Sol dominiu del Imperiu romanu, la zona de l'actual Carniola Seca pasó a formar parte de la provincia de Panonia. Tres el fin del dominiu romanu, los longobardos gobernaron la rexón, siguíos polos eslavos.

El Patriarcáu d'Aquilea foi propietariu de Carniola Seca mientres trescientos años, hasta que nel sieglu XIV pasó a tar sol dominiu de la Casa d'Habsburgu, xunto con toa Carniola. Carniola Seca, que sufriera considerablemente la opresión feudal, foi una de les primeres en xunise al llevantamientu de los campesinos eslovenos en 1515, que foi ganáu pola nobleza con métodos sangrientos.

Les cargues que pesaben sobre la población de Carniola Seca amenorgase namás coles reformes de María Teresa I d'Austria, anque'l so fíu Xosé II introdució restricciones pa los campesinos.

A pesar de la gran probeza, los habitantes de Carniola Seca yeren famosos porque munchos d'ellos vivíen más de cien años. Janez Vajkard Valvasor menta que los habitantes de Carniola Seca ellaboraban les sos propies medicines a partir de floritos medicinales.

Dempués de 1848, les muertes del feudalismu na rexón dexaron d'esistir (por casu, los gremios fueron finalmente abolíos) y, na década de 1880, empezó'l desenvolvimientu cultural en llingua eslovena, que foi empuestu en tou momentu por sacerdotes católicos llocales.

La Primer Guerra Mundial causó grandes daños a la yá insignificante economía de Carniola Seca. Yugoslavia nin siquier intentó solucionar los problemes, la carga fiscal nun s'amenorgó, el dineru colaba al sur y el centralismu fortalecíase.

Mientres la Segunda Guerra Mundial, Carniola Seca formó parte del territoriu anexionáu per Italia. Gran parte de la población de la zona refugó'l movimientu del Frente de Lliberación de la Nación Eslovena, lideráu polos comunistes, por cuenta a los asesinatos de civiles a manos de los partisanos y a los esfuerzos de los sacerdotes católicos llocales.

En marzu de 1944, aviones de la Luftwaffe bombardiaron les aldegues d'Ambrus y Zagradec, y n'abril los partisanos asesinaron al sacerdote católicu Franc Kern, párrocu d'Hinje, y desallugaron a 30 families. En 1945, les fuerces partisanes amburaron les aldegues d'Hinje y Žvirče.

Xeografía La Carniola Seca céntrase en redor a la llocalidá de Žužemberk, el so asentamientu más grande. El ríu Krka traviesa la zona. Al sur, la zona parte con el cordal de Mala Gora ("Pequeñu monte").

Na zona, que s'asitia sobro piedra caliar y dolomita karstificades permeables, esiste una escasez xeneral d'agua superficial, a traviés de la cual la mayor parte de les precipitaciones penerase nel suelu y lleguen al ríu Krka.

Economía Esta rexón ye una de les menos desenvueltes d'Eslovenia, y la so población ye escasa y va en descensu. La so débil posición económica ye consecuencia de les sos condiciones naturales desfavorables, combinaes con circunstancies históriques. La minería y la fundición fueron actividaes importantes na zona hasta'l sieglu XIX, pero sumieron alredor de 1900 por cuenta de la escasa accesibilidá del tresporte na zona. La construcción del ferrocarril de Baxa Carniola a lo llargo del ríu Temenica escontra l'este dexó al valle de Krka económicamente aislláu.

Na actualidá, Carniola Seca ye principalmente una zona agrícola, onde la mayor parte de la población dedicase a l'agricultura. Sicasí, solo alredor del 15% de les esplotaciones agrícolas dedicanse a l'agricultura a tiempu completu, y la mayoría de los demás agricultores tienen fontes d'ingresos adicionales procedentes d'actividaes non agrícoles. Por cuenta de los pocos empleos non agrícoles na zona, gran parte de la población muévese diariamente a centros industriales más grandes fuera de la rexón.

La conexón con estes zones vióse facilitada dende que se construyó l'autopista A2 que xune Llubliana y Novo Mesto.

La producción de vinu ye importante na rexón y remóntase a la dómina romana.

Referencies

Bibliografía

Enllaces esternos

Categoría:Xeografía d'Eslovenia