María del Consuelo Mendizábal Álvarez foi una notaria asturiana. Foi la primer muyer n'exercer l'abogacía n'Asturies y en 1942 convirtióse na primer muyer notaria d'España.
Biografía Consuelo Mendizábal Álvarez nació n'Uviéu. Yera fía del comerciante Celestino Mendizábal. Llicencióse en derechu na Universidá d'Uviéu, convirtiéndose asina na primer muyer en llogralo n'Asturies.
Participó na primer convocatoria d'oposiciones n'España al Cuerpu de Notarios que permitió la participación de muyeres, siendo almitida a la mesma el 9 de xunetu de 1935, lo que la convirtió na primer muyer opositora a notaria n'España. Antes de la Guerra Civil Española, tamién opositaron al Cuerpu de Notarios Margarita Baudín Sánchez y Carolina Bono Huerta.
Nun se realizaron nueves convocatories d'oposiciones a notariu mientres la guerra civil y la dictadura franquista volvió establecer que solo podíen opositar los homes españoles, en contra de la disposición de Constitución de la Segunda República española del 9 d'avientu 1931. Para respetar los derechos alquiríos de les muyeres qu'habíen opositao antes de la guerra, creóse una disposición transitoria que permitió que Consuelo Mendizábal Álvarez ingresara al Cuerpu de Notarios en 1942, siguida de Margarita Baudín Sánchez en 1944 y de Carolina Bono Huerta en 1947. Tuvo vixente hasta 1961 el vetu al ingresu de más muyeres nel Cuerpu de Notarios.
Mendizábal exerció como notaria en Madrid. Xubilóse en 1983. Defendía les idees de la República española y siguía les idees de Fernando de los Ríos. Lluchó pola reconocencia del divorciu n'España y amosóse contraria al papel que se daba a la muyer nel Códigu Civil y el Códigu Penal.
Reconocencies En 2021, por el Día Internacional de la Muyer, el Tribunal Constitucional d'España homenaxó a Consuelo Mendizábal al pie de les tamién xuristes Concepción Arenal, Clara Campoamor, Victoria Kent, Ascensión Chirivella Marín y María Jóver Carrión.
Referencies
Enllaces esternos
Categoría:Abogaos y abogaes d'Asturies Categoría:Alumnáu de la Universidá d'Uviéu Categoría:Persones d'Uviéu