Victorina Durán Cebrián foi una escenógrafa y diseñadora de vestuariu española, catedrática d'Indumentaria y Escenografía del Conservatoriu Nacional, pintora vanguardista asociada al surrealismu de los años venti y trenta del sieglu XX. Tres l'exiliu n'Arxentina, aportó a directora del Teatru Colón de Buenos Aires.
Biografía Nacida nuna familia burguesa, tradicionalista y culta (propietarios del abonu númberu 1 del Teatru Real), foi fía d'una baillarina de dichu teatru y d'un militar d'oficiu. Al ser refugáu pola familia'l so deséu de ser actriz, consolóse con estudiar dibuxu y pintura. Paradóxicamente, eso llevaríala a conocer y enchaldar con personaxes como Salvador Dalí, Remedios Varo, Maruja Mallo y Rosa Chacel. Asina, en completando ente 1917 y 1926 los sos estudios na Real Academia de Belles Artes de San Fernando de Madrid, ganó en 1929 la cátedra d'Indumentaria y Arte Escenográficu, siendo la primer española que llogró dichu puestu.
Antes d'aportar al cargu, Durán destacara como artista del batik nel VIII Salón d'Humoristes y na Esposición Nacional, onde exerció como secretaria, na sección d'arte decorativu de 1922. Tamién, participó na delegación española de la Gran Esposición d'Artes Decoratives de París de 1925 y formó parte un añu dempués del grupu de muyeres intelectuales y artistes, axuntáu por María de Maeztu para fundar el Lyceum Club (que'l so contestu foi pieza clave nel desenvolvimientu del Círculu Sáficu de Madrid).
Tamién trabayó con Cipriano Rivas Cheriff na creación del TEA (Teatru Escuela d'Arte) de Madrid, y realizó vestuarios y decoraos pa les compañíes de Margarita Xirgu, Federico García Lorca ya Irene López de Heredia; tamién fixo ambientaciones y decoraos para delles películes españoles de la dómina.
Como decoradora y escenógrafa na década de 1930, lliberóse del "arqueoloxismu de la escuela naturalista", creando un innovador amiestu de "vanguardia y costumismu popular". Escribió sobro les sos renovadores idees estétiques nuna serie d'artículos, publicaos nos diarios La Voz y La Libertad, ente 1935 y 1936, sol títulu xenéricu Escenografía y vestuario.
En 1937 n'españando la Guerra Civil Española, acompañó a Margarita Xirgu nel so exiliu americanu y afitó la so residencia n'Arxentina. Nesi país desempeñaría de forma simultánea los cargos de directora artística de los teatros Colón y Cervantes.
En collaboración con Susana Aquino inspiró la creación La Cuarta Carabela, Agrupación Hispánica de Siete Artes, el Grupu Teatru Indíxena, y collaboró como figurinista cola coreógrafa Mercedes Quintana.
Como pintora espunxo n'Uruguái, Chile, Brasil, Alemaña, o Francia, ente otros países.
En 1949 rompió'l exiliu para collaborar con Dalí en Don Juan Tenorio dirixíu por Luis Escobar Kirkpatrick nel Teatru Nacional d'España. A partir d'entós, viaxaría con frecuencia a Europa (n'especial a París y Madrid).
Na década de 1980 instalóse de forma definitiva na capital d'España, onde finó a los 94 años.
Dexó espresada la so "apasionada militancia nel lesbianismu nel contestu d'una España rancia ya intolerante" nes sos memories. Les sos obres Al margen y Así es supunxeron un exemplu narrativu d'amosar la sexualidá non normativa n'España.
Referencies
Bibliografía
Enllaces esternos
Categoría:Lesbianismu Categoría:LGBT n'España Categoría:Persones de Madrid Categoría:Escenógrafos y escenógrafes d'España Categoría:Diseñadores de vestuariu