Almudena Cueto Sánchez ye una abogada y política socialista asturiana. De 2015 a setiembre de 2019 foi directora xeneral del Institutu Asturianu de la Muyer.
Trayectoria Dirixente de Mocedaes Socialistes a los 19 años, de 1993 a 2001 foi conceyal del grupu municipal socialista nel Conceyu de Nava. Llicencióse en Derechu pola Universidá d'Uviéu y estudió un cursu d'Esperta Universitaria n'Axente d'Igualdá d'Oportunidaes na UNED y un máster universitariu en Sostenibilidá y Responsabilidá Social Corporativa na UNED y la Universidá Jaume I de Castelló.
A los 25 años treslladóse a Barcelona onde trabayó como consultora nuna compañía de seguros catalana onde trabayó de 2001 hasta 2004, momentu nel que tornó a Asturies. De 2004 a 2012 foi integrante del equipu d'Antonio Trevín na so etapa como delegáu del Gobiernu onde trabayó como asesora.
Foi fundadora de Más Innovación Social, empresa dedicada a xestionar la creación de valor compartíu pa les organizaciones, al traviés de la innovación social y de la responsabilidá social. Nes elecciones municipales de mayu de 2015 ocupó l'octavu llugar na llista del Partíu Socialista d'Uviéu qu'encabezó Wenceslao López y que consiguió 5 escaños.
De 2015 a setiembre de 2019 asumió el cargu de directora del Institutu Asturianu de la Muyer y de la Mocedá. La so predecesora foi Carmen Sanjurjo y la so sucesora Nuria Varela, nomada Directora Xeneral d'Igualdá.
Referencies
Enllaces esternos
Categoría:Abogaos y abogaes d'Asturies Categoría:Políticos y polítiques d'Asturies Categoría:Políticos y polítiques del Partíu Socialista Obreru Español Categoría:Feministes d'Asturies Categoría:Persones de Nava Categoría:Alumnáu de la Universidá d'Uviéu